4 Dane Yusup Kaangkat Dados Pengede Ageng Ring Mesir
4
Wusan kalih tiban sasampun pemimpin juru inuman kawaliang malih ring linggih danene,
duk punika raja Mesire polih ipian.
Ring paipian idane,
ida sedek ngadeg ring sisin tukad Nil.
Irika ida nyingak saking tukad Nil,
medal pitung ukud sampi sane mokoh tur becik awakne.
Sampi-sampine punika raris ngamah padang ring sisin tukad Nil.
Raris medal malih saking tukad Nil pitung ukud sampi sane berag aking lan bocok awakne,
nampek sampi-sampi sane mokoh punika.
Irika raris,
sampi-sampi sane berag aking punika ngamah sampi-sampi sane mokoh.
Raris sang prabu matangi.
Salanturnyane sang prabu makolem malih tur ida polih ipian sane lianan.
Ring paipian idane,
ida nyingak wenten mentik gandum pitung katih sane jelih tur melah.
Raris ida pada nyingak mentik pitung katih gandum sane berag tur tuh layu.
Raris gandum sane berag tur tuh layu punika nguluh gandum sane jelih tur becik punika.
Raris sang prabu matangi saking pakoleman idane.
Risampune semeng,
manah sang prabune dados inguh pisan.
Raris ida mrentahang makasami anak dueg lan wicaksana sane nguasain sekancan pengajah-ajahan,
mangda tangkil ring ida.
Raris sang prabu nyeritayang ipian idane nanging nenten wenten anak sane mresidayang ngartiang ipian idane.
Irika raris pemimpin juru inuman raja,
tangkil ring sang prabu tur matur,
“Inggih ratu,
ritatkala titiang kakrangkeng ring bui kalih tiban sane sampun lintang,
titiang matemu sareng anak saking Yahudi.
Ia prasida ngartiang ipian titiange idumun,
tatkala titiang sareng pemimpin juru ajengan irika.
Sekadi sane sampun kaartiang olih anake punika,
yakti sekadi punika mamargi.
Iratu ngawaliang titiang malih ring linggih titiange,
tur pemimpin juru ajengane punika kaukum.”
Raris sang prabu nitahang mangdane dane Yusup tangkil ring ajeng idane.
Pramangkin pemimpin buine ngamedalang dane Yusup saking buine.
Raris dane Yusup nyukur rambutnyane tur ngesehin penganggennyane raris dane tangkil ring ajeng raja Mesire punika.
Rika raris ida sang prabu ngandika kapining dane Yusup sapuniki,
“Nira ngipi,
nanging abesik ja tusing ada anak ane nyidang ngartiang ipian nirane.
Nira suba ningeh paundukan ragane ane nyidang ngartiang ipian.”
Irika raris dane Yusup matur sapuniki,
“Inggih ratu,
nenten ja titiang sane prasida ngartiang ipian,
nanging wantah Sang Hyang Tunggal sane ngicen piteges sane becik mangdane prasida ngartiang paindikane punika.”
Raris sang prabu nyeritayang ipian idane ring dane Yusup.
Risampune mirengin ipian idane,
raris dane Yusup nyeritayang artin ipian sang prabu punika.
Dane matur ring sang prabu sapuniki,
“Inggih ratu!
Malantaran ipiane punika,
Sang Hyang Tunggal sampun ngicenin piuning ring iratu indik napi sane jagi kalaksanayang Ida.
Makakalih ipian iratu punika madue arti sane pateh.
Makapitu sampine sane mokoh tur becik awakne lan makapitu gandum sane jelih pisan tur becik punika madue arti pitung tiban sane landuh pisan.
Nanging makapitu sampi sane berag aking tur makapitu gandum sane berag tur tuh layu punika madue arti pitung tiban masan sayah sane ageng pisan.
Krana kalintang ageng masan sayahe,
punika mawinan anake lali kapining masan landuhe idumun.
Iratu nerima paipiane punika kantos ping kalih,
duaning Sang Hyang Tunggal sinah jagi nglaksanayang paindikane punika.
Turmaning Sang Hyang Tunggal jagi gelis nglaksanayang paindikane punika.”
Raris dane Yusup ngaturang piteket ring sang prabu sapuniki,
“Inggih ratu,
sepatutne iratu ngangkat adiri anak sane wicaksana tur wikan mangda ipun nglaksanayang paindikan sane becik ring negara Mesir puniki.
Tur iratu pada ngangkat para tukang nuduk pajeg mangdane ipun sami nudukin apahlima asil manyi saking suang-suang panjak iratune.
Punika mangdane iratu prasida nyimpen gandum sane kalintang akeh kaanggen nyaga tatkala masan sayah sane ageng.
Tur mangdane sekancan panjak iratune slamet saking masan sayah sane ageng punika.”
Irika raris sang prabu tur para pengedene sane wenten irika nyingak,
wantah becik pisan pitekete punika.
Irika raris sang prabu ngandika sapuniki,
“Iraga tusing nyidang buin maan anak ane wicaksana muah dueg cara anake ene.
Ia anak ane kakuasain Roh Sang Hyang Tunggal.”
Raris sang prabu ngandika kapining dane Yusup sekadi puniki,
“Sang Hyang Tunggal sampun nyinahang makejang paindikane ene malantaran ragane.
Lan tusing ja ada buin anak cara ragane ane wicaksana lan dueg.
Ento mawinan nira ngangkat ragane dadi pengede agung ane nguasain druen nirane,
sekadi negara lan purin nirane.
Nanging tuah singasanan nirane ene ane ngranayang nira tegehan katimbang ragane.”
Raris sang prabu ngesahang dane Yusup dados pengede agung.
Tur sang prabu ngelesin bungkung sane madaging cap karajaan Mesir saking jerijin tangan idane tur nyalukin bungkunge punika ka jerijin tangan dane Yusupe.
Kenten pada dane Yusup kasalukin pengangge sane becik pisan saha kicenin kalung emas.
Raris sang prabu nitahin mangda dane Yusup kaunggahang ring kretan idane sane kaping kalih.
Lan sami anake musti bakti kapining dane Yusup.
Turmaning sang prabu pada ngicenin rabi kapining dane Yusup.
Sekadi asapunika dane Yusup kaangkat dados pengede agung ring negara Mesir.
Risampune punika,
raris dane Yusup ngiterin negeri Mesir.
Tanah negeri Mesir,
muponin asil gandum maliah-liah makacakan.
Raris dane Yusup nyimpen gandum punika akeh pisan ring kota-kota ring sebilang wawidangan.
Turmaning gandum sane kasimpen punika akehnyane kantos nenten sida antuk metek.
Risampune masan landuh punika liwat,
raris rauh masan sayah sane ageng pisan,
sekadi sane sampun kabaosang olih dane Yusup.
Ring saluirin negeri irika wenten sayah sane ageng pisan,
nanging wantah ring negara Mesir wenten gandum.
Ritatkala gandum ring panjak Mesire telas,
irika raris dane Yusup ngampakang glebeg-glebeg sane kaanggen nyimpen gandum-gandume punika.
Dane Yusup ngadol gandume punika kapining sekancan panjak Mesire.
Kenten pada saking saluirin jagat,
anake pada rauh jagi numbas gandum ka Mesir krana masan sayahe punika ageng pisan ring saluirin jagate.